Alþingi dæmt til að greiða ræstingakonu 1.200 þúsund krónur

Hæstiréttur dæmdi í dag Alþingi til þess að greiða fyrrverandi starfsmanni sínum 1.200 þúsund krónur í skaðabætur vegna ólöglegrar uppsagnar haustið 2009. Alþingi hafði áður verið sýknað fyrir Héraðsdómi Reykjavíkur.

Fyrrverandi starfsmanninum, konu sem vann við ræstingar, var sagt upp störfum eftir að hafa verið í veikindaleyfi í 360 daga og var réttur hennar til launa samkvæmt kjarasamningi þá  fallinn niður.

Í dómi Hæstaréttar kemur fram að konan hefði þá ekki verið fær sökum líkamlegrar vanheilsu að hefja að nýju vinnu í fullu starfi. Þótt konan hefði verið búin að glata rétti sínum til launa hefði Alþingi ekki verið heimilt samkvæmt kjarasamningi að leysa hana frá störfum vegna umrædds heilsubrests fyrr en í ágúst 2010, nema hún hefði sjálf óskað þess.

Ekki var gengið úr skugga um hvort líkamleg heilsa konunnar hefði þá enn staðið í vegi fyrir að hún gæti tekið við fyrra starfi sínu og henni var ekki gefinn kostur á að tjá sig um fyrirhuguð starfslok á þeim tíma.

Alþingi var því dæmt til að greiða konunni ofangreindar skaðabætur, auk málskostnaðar, samtals 1.800 krónur.