Þúsundir koma saman vegna útfarar Tugce

Þúsundir manna komu saman í Þýskalandi i dag vegna jarðarfarar ungrar konu sem lést eftir að hafa komið upp á milli árásarmanns síns og tveggja kvenna sem hann var að áreita.

Minningarathafnir hafa verið haldnar víða um Þýskaland síðustu daga, allt frá því að hin 23 ára Tugce Albayrak lést á föstudaginn.

Í frétt BBC segir að þrjú þúsund manns hafi komið saman við í útför konunnar sem fram fór í Waechtersbach nærri Frankfurt fyrr í dag. Sendiherra Tyrklands var á meðal gesta en Tugce var af tyrkneskum uppruna.

Árásin var gerð þann 15. nóvember í bænum Offenbach þar sem Tugce var veitt hnefahögg sem að lokum leiddi hana til dauða. Ákveðið var að slökkva á öndunarvél konunnar á föstudaginn, á 23 ára afmælisdegi hennar, en hún komst aldrei til meðvitundar eftir árásina.

Árásin hefur vakið gríðarlega athygli í Þýskalandi, en Tugce kom konunum tveimur til bjargar eftir að hún heyrði óp á bílaplani fyrir utan skyndibitastað í Offenbach síðla nætur þann 15. nóvember.

Þýska blaðið Bild birti myndskeið af árásinni úr öryggismyndavél fyrr í vikinni, en lögregla vonaðist til að fleiri vitni myndu gefa sig fram.

Rúmlega 100 þúsund manns hafa skorað á Joachim Glauck Þýskalandsforseta að veita Tugce heiðursorðu. Gauck sagðist ætla að taka áskorunina til skoðunar, en í bréfi til fjölskyldu Tugce kveðst hann skelfingu lostinn vegna dauða hennar. Allir standi í þakkarskuld við hana. „Hún verður ávallt fyrirmynd fyrir okkur öll og öll þjóðin syrgir hana.“