"Stundum hata ég mig“ – Dragdrottning hélt grimma ræðu

Ein þekktasta dragdrottning Írlands, Panti Bliss, hélt um síðustu helgi eftirtektarverða og tilfinningaþrungna ræðu í írska þjóðleikhúsinu um fordóma sem hinsegin fólk verður fyrir.

Á vefsíðunni Pink News segir að margir hafi tárast yfir ræðunni en í henni spyr Bliss meðal annars þeirrar spurningar af hverju hinsegin fólk ætti að sætta sig við sífelldar deilur um það hvaða réttindi þau eigi skilið og ekki.

Í ræðunni segir hún hvers vegna hún trúi því að ákveðnar aðgerðir séu fordómafullar í garð hinsegin fólks. Slíkar aðgerðir hafi síðan afleiðingar fyrir hinsegin fólk í daglegu lífi þeirra.

„Stundum hata ég sjálfa mig, ég andskotans hata mig,“ segir hún um þegar hún nemur staðar á gangbrautum og veltir útliti sínu fyrir sér. „Og ég hata ykkur stundum fyrir að gera mér það.“

Ræða Bliss hefur vakið mikla athygli fyrir að vera allt í senn heiðarleg og grimm.

Hér að neðan er hægt að horfa á ræðu Bliss: