Skoraði þrennu í fyrsta landsleiknum sínum

Það er óhætt að segja að Alan Pulido hafi byrjað landsliðsferilinn vel og um leið farið langt með því að tryggja sér sæti í HM-hópi Mexíkómanna þegar hann skoraði þrjú mörk í 4-0 sigri Mexíkó á Suður-Kóreu í vináttulandsleik í Texas í nótt.

Alan Pulido er 22 ára gamall og hefur alla tíða spilað með Tigres UANL í mexíkósku úrvalsdeildinni í fótbolta. Miguel Herrera, þjálfari Mexíkó, valdi Pulido í fyrsta sinn og henti honum beint inn í byrjunarliðið en leikmaðurinn hafði skorað 11 mörk í 12 leikjum með 23 árs landsliði Mexíkó.

Oribe Peralta tryggði Mexíkó gullið á Ólympíuleikunum í London og hann kom liðinu í 1-0 á 37. mínútu í þessum leik. Pulido potaði inn sínu fyrsta marki á lokamínútu fyrri hálfleiks og bætti síðan tveimur mörkum við undir lok leiksins eftir skyndisóknir. „Ég hefði aldrei getað ímyndaði mér svona góða byrjun með landsliðinu. Þetta er mjög óvænt," sagði Alan Pulido eftir leikinn.

„Pulido er leikmaður sem er tilbúinn að berjast fyrir boltanum og hann kann að skora. Það er einmitt það sem við þurfum. Nokkrir leikmannanna í þessum leik stóðu sig mjög vel í þessum leik og verða inn í myndinni þegar ég vel HM-hópinn minn," sagði Miguel Herrera eftir leikinn.

Mexíkó er í riðli með Brasilíu, Kamerún og Króatíu á HM í Brasilíu næsta sumar en liðið mun spila sinn næsta undirbúningsleik á móti Nígeríu í mars.