Sigur hjá Inter í Ítalíuslag

Inter bar sigurorð af Roma með tveimur mörkum gegn engu í A-riðli á Champions Cup sem fer fram í Bandaríkjunum þessa daganna. Leikið var á Lincoln Financial Field í Philadelphia.

Nemanja Vidic kom Inter yfir í uppbótartíma fyrri hálfleiks með skalla eftir aukaspyrnu frá Brasilíumanninum Dodo.

Japaninn Yuto Nagatomo gulltryggði svo Inter sigurinn þegar þrumaði boltanum í slána og inn á 69. mínútu.

Seinna í kvöld mætast Real Madrid og Manchester United í lokaleik A-riðils, en enska liðið þarf að ná í a.m.k. eitt stig til að komast í úrslitaleikinn sem fer fram á Sun Life Stadium í Miami á mánudaginn.

Leikurinn hefst klukkan 20:05 og verður sýndur í beinni útsendingu á Stöð 2 Sport 2.