Forstjóri Landspítalans: Þrengslin á spítalanum ekki boðleg

Mósasýking er komin upp í þriðja sinn á þessu ári á Landspítalanum. Mikið álag hefur því verið á starfsmönnum smitsjúkdómadeildar og smitsjúkdómavarna, einna helst í ljósi þess að mikill þungi hefur verið í undirbúningi viðbragðsáætlunar Landspítala vegna ebólu. Þetta kemur fram í pistli Páls Matthíassonar, forstjóra Landspítalans.

Hann segir mósasýkingu í eðli sínu afar erfiða viðureignar og sérstaklega mikilvægt að halda henni í skefjum vegna þess hve hættuleg hún er veiku fólki. „Sýking af þessu tagi skapar mikið óhagræði og álag á viðkomandi deild þar sem í raun þyrfti að loka henni og þrífa hana,“skrifar Páll.

Þá segir hann aðstæður Landspítalans hvað varðar legurými og húsakost vera með þeim hætti að afar erfitt sé að glíma við þennan vágest með fullnægjandi hætti, þar sem ekki sé hægt að loka hverju einasta plássi. Hvað þá heilu og hálfu deildunum.

„Þrengsli þau sem veiku fólki er boðið upp á hér á Landspítala eru ekki boðleg eins og sést vel þegar álag eykst  - en það eru því miður ekki ný tíðindi.“

Mósa (Meticillin ónæmur Staphylococcus aureus) er baktería sem er að hluta til ónæm fyrir sýklalyfjum. Hún er ekki hættuleg hraustum einstaklingum en getur haft alvarleg áhrif á einstaklinga sem eru veikir fyrir. Bakterían er að mestu einkennalaus og algengt er að fólk beri hana í nefi eða á húð án nokkurra einkenna. Þaðan getur hún borist í sár eða viðkvæma einstaklinga og valdið sýkingum. Sýkingarnar eru misalvarlegar, allt frá einföldum húðsýkingum til lífshættulegra blóðsýkinga. Bakterían berst oftast á milli manna með snertingu.