ESB undirbýr málaferli vegna sölu Möltu á ríkisborgararétti

Framkvæmdastjórn Evrópusambandsins (ESB) býr sig undir málaferli gegn stjórnvöldum á Möltu vegna ákvörðunar þeirra um að selja ríkum einstaklingum ríkisborgararétt.

Malta hyggst bjóða vellauðugu fólki að kaupa ríkisborgararétt fyrir 650 þúsund evrur í reiðufé, auk 150 þúsund evra sem eyða þarf í fjárfestingu á Möltu. Þetta samsvarar samtals tæpum 126 milljónum króna. Þetta hefur lagst illa í stjórnvöld í öðrum ríkjum ESB, þar sem ríkisborgararéttur í einu ríki veitir víðtæk réttindi í öllum ríkjum sambandsins.

Rök framkvæmdastjórnarinnar eru þau að með því að selja ríkisborgararétt séu þau í raun að selja réttinn til að búa í öllum aðildarríkjunum 28, að því er fram kemur á fréttavefnum EU Observer. Það skapi áhættu fyrir hin aðildarríkin ef stjórnvöld á Möltu gæti ekki nægilega að því að koma í veg fyrir að glæpamenn fái ríkisborgararétt með þessum hætti.

Framkvæmdastjórnin hyggst reyna að koma í veg fyrir þetta á grundvelli greinar 4.3 í sáttmálanum um Evrópusambandið. Talið er að stjórnvöld á Möltu gætu talist brotleg við það ákvæði sem segir að ríki skuli vera einlæg í samvinnu sinni.

Þetta er nokkuð önnur afstaða en framkvæmdastjórn ESB lét uppi í nóvember í fyrra. Þá taldi Framkvæmdastjórn ESB skýrt að Evrópudómstóllinn hafi ítrekað staðfest að ríki ráði því sjálf hverjum þau veiti ríkisborgararétt, og að ESB hafi engan rétt til að koma í veg fyrir að Malta selji ríkisborgararétt sinn.