17 ára stúlka ein þeirra sem lést

Ein þeirra sem lét lífið í árekstrinum í Sokna í gærkvöldi var sautján ára stúlka. Þessu greina norskir miðlar frá. Auk hennar létu tveir aðrir lífið, tveir karlmenn fæddir 1963 og 1944. Tveir liggja þungt haldnir á sjúkrahúsi en fjórir aðrir sem slösuðust eru ekki í alvarlegu ástandi.

Þetta staðfestir Arne Erik Hakonsen, lögreglumaður í Ringeríki í Noregi í samtali við fréttamann Vísis. Hokonsen ítrekaði að íslenski ökumaður flutningabílsins hafi ekki verið undir áhrifum áfengis eða annarra vímuefna við akstur sinn. Aðstæður hafi verið gífurlega erfiðar og mikil hálka á veginum. Flutningabíllinn var þó á góðum vetrardrekkjum.

„Skýrsla var tekin af manninum, ökuskírteini hans tekið en hann er ekki í varðhaldi“ sagði Erik aðspurður um stöðu Íslendingsins. Hakonsen staðfesti einnig að Íslendingurinn væri búsettur í Noregi. 

Fyrr í dag var greint frá því á vef NRK að ökuskírteinið hefði verið tekið af manninum venju samkvæmt vegna alvarleika slyssins. Með Íslendingnum í flutningbílnum var annar maður sem einnig var af erlendu bergi brotinn.

Rútan var á áætlunarleið á milli Óslóar og Lærdal. Flutningabílarnir eru báðir í eigu norsks fyrirtækis.