Óttast mun fleiri ebólusmit í Síerra Leóne

Ebóla hefur nú borist til eina svæðisins í Síerra Leóne þar sem sjúkdómsins hefur ekki orðið vart áður. Guardian greinir frá.

Óttast er að fleiri á svæðinu eigi eftir að smitast af ebólu og dauðsföll því aukast af völdum hennar.

Svæðið sem um ræðir heitir Koinadugu og er nokkuð afskekkt. Teymi frá Rauða krossinum fór þangað í gær en þá höfðu 30 manns dáið af völdum ebólu á svæðinu.

Íbúar í Koinadugu höfðu verið í sjálfskipaðri sóttkví í fjóra mánuði. Það er því mikið áfall að ebólusmit hafi nú borist þangað en talið er að 225 manns á svæðinu hafi nú þegar smitast.

1.510 manns hafa látist af völdum ebólu í Síerra Leóne og meira en 5.000 manns hafa smitast.