Vilja óháð mat á hagmunum Íslendinga af hvalveiðum

Níu þingmenn Samfylkingar, Vinstri grænna, Pírata og Bjartrar framtíðar hafa lagt fram tillögu til þingsályktunar þess efnis að óháð mat fari fram á hagmunum Íslendinga vegna hvalveiða í íslenskri lögsögu. Meta eigi verðmæti útflutnings á hvalkjöti, kostnaður við kynningu af hálfu stjórnvalda vegna hvalveiðistefnunnar og álits fræðimanna, hagsmunaaðila og viðeigandi félagasamtaka um áhrif hvalveiðistefnu stjórnvalda á afkomu ferðaþjónustu og á stöðu Íslands á alþjóðavettvangi.

Hvalveiðar Íslendinga hafi lengi verið umdeildar og bakað okkur óvinsældir nokkurra erlendra ríkja, einna helst Bandaríkjanna. Skemmst er að minnast þess að í byrjun apríl sendi Barack Obama Bandaríkjaforseti frá sér minnisblað þar sem hann gagnrýndi harðlega veiðar Íslendinga á langreyði og sagði þær stefna tegundinni í voða. Sagðist hann vilja endurskoða samstarf ríkjanna tveggja í ljósi hvalveiðanna.

Í nýju tillögunni kemur fram að leggja þurfi mat á bæði efnahagsleg og pólitísk áhrif þessara aðgerða Obama. Sömuleiðis þurfi að kanna hvort niðurstöður vísindarannsókna bendi til þess að hvalveiðar séu nauðsynlegar til þess að halda jafnvægi í lífríki sjávar, líkt og „iðulega“ hafi komið fram í umræðu um veiðarnar.

Þau Sigríður Ingibjörg Ingadóttir, Svandís Svavarsdóttir, Björt Ólafsdóttir, Birgitta Jónsdóttir, Helgi Hrafn Gunnarsson, Katrín Júlíusdóttir, Lilja Rafney Magnúsdóttir, Óttarr Proppé og Össur Skarphéðinsson eru flutningsmenn tillögunnar, sem lesa má í heild sinni hér.