Búið að slökkva eldinn: „Við vildum umgangast eldinn af mikilli varúð“

Eldur kviknaði í ruslahaug á þriðja tímanum í dag. Bílar frá tveimur slökkvistöðum voru kallaðir út vegna eldsins. Á rúmum hálftíma var búið að slökkva eldinn. Vísir greindi frá málinu rétt eftir að kviknaði í ruslahaugnum.

Svo virðist sem kviknað hafi í ruslahaug fyrir utan fyrirtækið Furu sem er til húsa í Helluhrauni 3. Eldurinn barst yfir í vinnuvél sem stóð í ljósum logum. Slökkviliðsmenn frá Hafnarfirði og Skógarhlíð komu á vettvang, ásamt lögreglu og sjúkraflutningamönnum.

Vegna þess að ekki var vitað hvaða efni leyndust í ruslahaugnum var svæðið girt af og ráðstafanir gerðar líkt og um sprengihættu væri að ræða. Þetta staðfestir Ólafur Ingi Grettisson, innivarðstjóri hjá Slökkviliðinu á höfuðborgarsvæðinu. „Eldsupptök eru ekki kunn að svo stöddu, en lögreglan mun væntanlega kíkja á það mál. Við vildum umgangast eldinn af mikilli varúð, því þegar það er eldur í svona haug veit maður aldrei hvað leynist í honum.“

Ólafur segir að margir hafi haft samband við slökkviliðið vegna málsins. „Já, það var mikill reykur frá eldinum og margir urðu hans varir og létu okkur vita.“