Forstjóri Landsnets segir menn þurfa að þola sannleikann

Þórður Guðmundsson, forstjóri Landsnets, segir afar leiðinlegt að einn af valdamestu sveitarstjórnarmönnum á Akureyri síðustu fjögur ár skuli saka hann um að segja ekki sannleikann um samskipti sveitarfélaganna við Landsnet. Þórður hafi í sínu máli sagt satt og rétt frá og ef menn séu ósáttir við orð hans verði það bara að vera svo.

„Mér finnst hálfleiðinlegt að Oddur skuli taka svona til orða, ég sé ekki hvers vegna í ósköpunum ég ætti að vera að segja ósatt, ég hef sagt satt og rétt frá.“

Hann segir að sveitarfélögin hafi ætlað að vinna sameiginlega að lausn á vandamálum raforkuflutninga. Haldinn hafi verið fundur fyrir um ári og þá ætluðu menn heim í hérað og vinna hlutina í sameiningu og boða svo til fundar með Landsneti.

„Ég er á þeirri skoðun að sveitarfélögin hafi dregið lappirnar því að menn ætluðu að boða aftur til fundar með Landsneti en ekkert hefur gerst. Við höfum bæði beðið um fund með sveitarfélögum skriflega sem og í töluðu máli. Í dag hefur enn enginn fundur verið boðaður. Þetta er svona dæmi um það að menn hafi verið að draga lappirnar. Það kom svo sem fram í orðum Odds að hann vildi hjálpa til við að ná Blöndulínu með jarðstreng, en það er ekki hægt að ákveða það einhliða,“ segir Þórður Guðmundsson.