Þrýsta á Assad til að leyfa mannúðaraðstoð

Utanríkisráðherrar Rússlands og Bandaríkjanna, þeir John Kerry og Sergei Lavrov, segja að Bashar al Assad Sýrlandsforseti íhugi nú að gera hjálparstofnunum kleift að koma fólki til aðstoðar á átakasvæðum.

Einnig sé verið að skoða hvort Sýrlandsstjórn og uppreisnarmenn geti skipst á föngum.

Valerie Amos, mannréttindafulltrúi Sameinuðu þjóðanna, skoraði um helgina á ríki heims til að grípa til aðgerða sem fyrst, svo koma megi nauðstöddum íbúum Sýrlands, einkum þeim sem eru innikróaðir á átakasvæðum, til aðstoðar.

Meira en níu milljónir manna í Sýrlandi þurfa nauðsynlega á aðstoð að halda sem allra fyrst: „Margar fjölskyldur búa í yfirgefnum byggingum, skólum eða bráðabirgðaskýlum, án þess að hafa nóg af mat, hreinu vatni eða lyfjum. Við verðum að hjálpa þeim að komast í gegnum þennan kalda vetur,” segir Amos.

Þeir Kerry og Lavrov hafa sitja nú á fundum í París, annan daginn í röð, og reyna að þrýsta á sýrlenska stjórnarandstæðinga í von um að fá þá til að taka þátt í friðarviðræðum við Sýrlandsstjórn.

Þær viðræður eiga að hefjast í næstu viku.

Rússum tókst á síðasta ári að fá Assad Sýrlandsforseta til að fallast á að öllum efnavopnum stjórnarhersins verði eytt.