Rússneska bílalestin nálgast landamærin

Rúmlega hundrað rússneskir flutningabílar nálgast nú landamæri Úkraínu en þeir eru sagðir flytja hjálpargögn til stríðshrjáðra í austurhluta landsins. Að sögn fréttaritara BBC á staðnum virðist sem bílalestin stefni nú að rússnesku landamæraborginni Rostov sem er nálægt þeim svæðum í Úkraínu sem uppreisnarmenn hafa enn á sínu valdi.

Yfirvöld í Úkraínu segja að bílalestin fái ekki að koma inn fyrir landamærin án þess að hún verði skoðuð rækilega af alþjóðlegum eftirlitsaðilum. Rússar hafna hinsvegar staðfastlega öllum ásökunum þess efnis að farmur bílanna innihaldi hergögn sem ætluð eru uppreisnarmönnum. Slíkar ásakanir segja þeir fáránlegar. Í upphafi voru bílarnir raunar mun fleiri, eða nærri 300 og ekki er ljóst hvert hinir hafa þá farið.

Átökin í Úkraínu hafa harðnað síðustu vikur og af þeim rúmlega tvöþúsund sem fallið hafa í átökunum frá því í apríl hefur um helmingur dáið á síðustu tveimur vikum að því er talsmenn Sameinuðu þjóðanna segja.