200 sjúklingar „létust“ vegna mistaka spítalans

Sjúkrahús í Ástralíu baðst í dag afsökunar á því að hafa fyrir mistök sent út dánartilkynningar um 200 sprelllifandi sjúklinga spítalans.

Austin sjúkrahúsið í Melbourne, næstfjölmennustu borg Ástralíu, sendi tilkynninguna á heimilislækna sjúklinganna sem skráðu þá hjá sér sem látna og „drápu“ þeir þannig á þriðja hundrað manns á einu bretti.

Mistökin komu til vegna breytinga á sniðmátinu sem er notað þegar tilkynnt er um útskrift sjúklinga af spítalanum, er fram kemur í tilkynningu frá talsmanni sjúkrahússins.

„Við biðjum starfsmenn heilsugæslanna sem urðu fyrir mistökum okkar innilegrar afsökunar en þeir sýndu þessu, í flestum tilvikum, mikinn skilning,“ segir í tilkynningunni.

Spítalinn undirstrikaði að mistökin hefðu ekki haft áhrif á meðhöndlun sjúklinganna.

Læknafélag Ástralíu lýsti mistökunum sem óásættanlegum og til þess fallnar að valda aðstandendum og heimilslæknum miklum óþægindum á meðan stjórnarandstæðingur sagði málið holdgerving hins mikla álags á heilbrigðiskerfi landsins.