Frelsuð úr haldi mannræningja

Lögreglumenn hafa frelsað Carlesha Freeland-Gaither úr haldi mannræningja sem hefur verið handtekinn. Carlesha var numin á brott í Philadelphia á sunnudaginn, en atvikið náðist á myndbandi sem lögreglan birti.

Hún fannst um 200 kílómetrum frá staðnum þar sem henni var rænt rúmum þremur dögum seinna.

Kvittun fannst skammt frá staðnum þar sem henni hafði verið rænt, sem sýndi að mannræninginn, Delvin Barnes, hafði notað kort hennar til að kaupa snakk. Þannig komst lögreglan yfir skýrari myndband af Barnes sem notað var til að bera kennsl á hann.

Bílasölumaður sem sá það myndband í sjónvarpi hafði samband við lögreglu þar sem hann hafði selt Barnes bíl skömmu áður. Þá kom í ljós að sölumaðurinn hafði fest GPS tæki við bílinn, þar sem hann grunaði að Barnes hefði ekki efni á að borga af bílnum.

Þegar lögreglan kom að bílnum við verslunarmiðstöð í Baltimore voru bæði Barnes og Carlesha í aftursætinu. Farið var með hana á sjúkrahús og er hún nú með fjölskyldu sinni.

Devlon Barnes fór fyrir dómara í gær en hans bíður annað dómsmál vegna morðtilraunar gegn táningsstúlku í byrjun október.