Myndband sýnir konu numda á brott úti á götu

Carlesha Freeland-Gaither var á leiðinni heim til sín í fyrrakvöld þegar maður réðst á hana úti á götu og nam hana á brott.

Freeland-Gaither býr í Philadelphiu í Bandaríkjunum en hún hafði verið í heimsókn hjá guðsyni sínum þegar árásin átti sér stað.

Á meðfylgjandi myndbandi sem lögreglan í Philadelphiu hefur sent frá sér má sjá hvernig konan berst um þegar ráðist er á hana.

Maðurinn virðist draga hana eftir götunni og koma henni svo inn í bíl. Lögreglan telur að Freeland-Gaither hafi reynt að komast út úr bílnum áður en keyrt var með hana í burtu.

Lögreglan rannsakar nú málið og vonar að myndbandið muni auka líkurnar á að finna konuna og árásarmanninn.