Hjúkrunarheimili við Sléttuveg: Ekkert á bak við viljayfirlýsingu fyrrverandi ráðherra

Heilbrigðisráðherra segir ekkert fjármagn hafa fylgt viljayfirlýsingu forvera síns um byggingu 88 rýma hjúkrunarheimilis við Sléttuveg. Borgarstjórn skoraði í gær á ráðherrann að standa án tafar við yfirlýsinguna og formaður velferðarráðs segir borgina sitja eftir, þar sem þörfin sé brýnust.

Velferðarráðuneytið hefur gert ráð fyrir hjúkrunarheimili með 88 hjúkrunarrými við Sléttuveg allt frá árinu 2008 og um svipað leyti var það staðfest í skipulagi borgarinnar. Ekkert hefur gerst ennþá en vegna hlutfallslegrar fjölgunar aldraðra á næstu árum, er ljóst að þörf fyrir hjúkrunarrými mun aukast hratt.

Björk Vilhelmsdóttir, formaður velferðarráðs Reykjavíkurborgar, segir búið að byggja öll hjúkrunarheimili úr áætlun ríkisins frá árinu 2008 nema við Sléttuveginn. Þar standi einnig til að Hrafnista byggi íbúðir og þjónustumiðstöð fyrir aldraða. „En það er ekki hægt að byrja nema fyrir liggi vilji ráðuneytisins og við bara getum ekki beðið lengur því þörfin er brýnust í Reykjavík. Við skiljum ekki af hverju við höfum setið eftir. Öll borgarstjórn segir hingað og ekki lengra, við getum ekki beðið lengur,“ segir Björk.

Í Reykjavík bíða þegar yfir hundrað manns eftir hjúkrunarrýmum. „Til þess að viðhalda sama þjónustustigi árið 2025 og er í dag, þarf að byggja 500 rými í borginni,“ segir hún.

Kristján Þór Júlíusson, heilbrigðisráðherra, segir Guðbjart Hannesson, þáverandi velferðarráðherra, hafa skrifað undir viljayfirlýsinguna skömmu fyrir þingkosningar í fyrra án þess að nokkuð fjármagn hafi fylgt henni. Hann segir rangt að öll önnur fyrirhuguð hjúkrunarheimili frá 2008 séu risin því sú áætlun hafi verið lögð til hliðar árið 2009 og ný gerð um byggingu 11 hjúkrunarheimila, meðal annars í Hafnarfirði, Kópavogi og á Seltjarnarnesi.

„Svo ég skil ekki hvernig þetta varð niðurstaðan,“ segir Kristján Þór. Hann segir þrjú síðastnefndu heimilin eiga að vera risin í síðasta lagi 2015. „Það hefur ekki staðið á ríkinu varðandi fjármögnun þeirra heimila sem fyrirhuguðuð voru,“ segir hann.

Aðspurður kveðst hann þó taka mark á ákalli borgarinnar. „Það liggur fyrir að við þurfum að gera betur í byggingu hjúkrunarrýma  en til þess að maður geti lofað einhverju um byggingaráform verður maður að hafa fjármögnun á þeim sömu loforðum. Ég gef ekki út viljayfirlýsingar nema ég hafi tryggingu fyrir því að geta uppfyllt þær,“ segir Kristján.