Heimili Lauru Palmer til sölu

Hús sem notað var sem heimili hinnar 17 ára Lauru Palmer í bandarísku sjónvarpsþáttaröðinni Twin Peaks hefur verið sett á sölu. Húsið er í bænum Everett í Washington-ríki á vesturströnd Bandaríkjanna og er kaupverðið tæpar 50 milljónir íslenskra króna. Að sögn Rolling Stone er ytra útlit hússins það sama og í þáttaröðinni sem tekin var upp fyrir um aldarfjórðungi síðan. Ruggustóll Palmer-fjölskyldunnar mun einnig fylgja með í kaupunum.

Þáttaröðin varð gríðarlega vinsæl þegar hún hóf göngu sína árið 1990 en hún hefst á því að lík Palmers finnst í vatni í bandaríska smábænum Twin Peaks. Einungis tvær þáttaraðir voru framleiddar og voru þær í leikstjórn David Lynch. Þættirnir fengu mikið sjónvarpsáhorf í Bandaríkjunum og víðar, en mikið dró úr áhorfi eftir að opinberað er hver drap Palmer í miðri annarri þáttaröð.