Monk: Mistökin voru dýr

Garry Monk, stjóri Swansea, var ekkert allt of ósáttur við leik sinna manna í kvöld þó svo það hafi tapað 4-1 gegn Liverpool.

„Mér fannst við spila ágætlega. Við vorum meira með boltann og sköpuðum okkur færi. Mistökin voru okkur dýr. Manni er refsað í svona sterkri deild," sagði Monk en hans menn skoruðu sjálfsmark og svo sparkaði Fabianski markvörður í Lallana og þaðan fór boltinn í netið.

„Fabianski hefur verið frábær í vetur en það gera allir leikmenn mistök. Liðið tapar sem heild. Ég hef ekki séð sjálfsmarkið hjá Shelvey aftur þannig að ég ætla ekki að tjá mig um það."