Dramatískur stjórnarfundur í Útvarpshúsinu

Klukkan 16:00 hefst stjórnarfundur hjá RÚV ohf og er gert ráð fyrir því að sá fundur verði dramatískur. Fjárlög sem urðu að lögum í vikunni fela í sér það að afnotagjöld af Ríkisútvarpinu lækka. Forsvarsmenn RÚV hafa lagt á það ríka áherslu að það feli í sér slíkar tekjuskerðingar til miðilsins að óhjákvæmilegt sé að til niðurskurðar komi, slíks að annað eins hefur ekki sést.

Björg Eva Erlendsdóttir er stjórnarmaður og hún segist ekki í aðstöðu til að tjá sig um fundinn nema á almennum nótum. Hún bendir á að í lögum frá löggjafarþinginu sé gert ráð fyrir því að RÚV ohf uppfylli ýmsar skyldur og kvaðir: „Það er fróm ósk frá stjórn að alþingi, sem leggur allt þetta á fyrirtækið, aflétti þeim kröfum eða láti fjármagn fylgja. En, þau ætla að gera hvorugt og við því þarf stjórnin að bregðast í dag.“

Staðan verri en sáu fyrir

Vísir spurði Magnús Geir Þórðarson fáeinna spurninga í ljósi þessarar stöðu og bárust svör frá honum á þriðjudagskvöld. Sú fyrsta var hvort þessi rekstrarstaða sé allt önnur og talsvert verri en hann hafði búist við, lá fyrir eða lögð hafði verið upp við þig, þegar hann gafst kost á sér í þetta verkefni?

„Þegar ný framkvæmdastjórn tók til starfa í vor var gerð sjálfstæð úttekt á tilteknum þáttum sem snúa að fjárhagsstöðu RÚV. Það er rétt að staðan var  allnokkru verri en menn höfðu áttað sig á og uppsafnaður vandi stærri en menn höfðu gert sér grein fyrir. Það er þó hægt að tækla þennan vanda, annars vegar með eignasölu sem er í góðum farvegi og hins vegar ef RÚV fær tekjur í samræmi við óskert og óbreytt útvarpsgjald. Þannig væri hægt að tryggja blómlega starfsemi RÚV til næstu ára.“

Engar aðgerðir útfærðar

Nú er óljóst hvað þessi fjárlög hafa í för með sér. Sumir vilja meira að segja meina að framlög til Ríkisútvarpsins aukist meðan stjórnendur þar bera sig illa. Þetta er fremur ruglingslegt og líkast til gera fæstir sér grein fyrir afleiðingum þessa. En, hvernig sér útvarpsstjóri hvað gerist í kjölfarið? Hvað verður skorið niður, nákvæmlega? Eru komin einhver drög að slíku?

„Við höfum ekki útfært neinar aðgerðir, hvorki uppsagnir eða niðurfellingu á dagskrárliðum. Það er enda ekki tímabært. Ég bind enn vonir við að menn sameinist um að leysa málið.  Ef framlög til starfseminnar eins og lagt var upp með í útvarpslögum eru tryggð þá skapast  ró og friður til að byggja Ríkisútvarpið upp eftir mjög erfiðar sparnaðaraðgerðir undanfarinna ára.“

Vongóður útvarpsstjóri

Magnús Geir greindi nýlega frá því í grein að útvarpsgjaldið sem hver einstaklingur greiði sé sambærilegt að krónutölu við það sem þekkist hjá öðrum norrænum ríkisfjölmiðlum og nokkru lægra en hjá BBC og fleiri ríkisstöðvum í Evrópu. Stjórn RÚV hefur óskað eftir því að félagið fái útvarpsgjaldið óskert svo að tryggja megi áframhaldandi öflugt Ríkisútvarp, með sambærilegar skyldur og hlutverk og verið hefur. Magnús sagði óbreytt útvarpsgjald duga til að standa undir öflugri dagskrá og nauðsynlegum úrbótum á dreifikerfi. Ekki sé þörf á að hækka gjaldið eða veita sérstök fjárframlög til RÚV.

Þá sagði hann í viðtali við Stöð 2 3.680 milljónir ekki duga fyrir RÚV til að sinna lögboðnum skyldum sínum. En, nú stendur til að lækkka gjaldið -- hefur hann velt fyrir þér að segja upp störfum vegna þessarar stöðu?

„Ég er enn vongóður um að við finnum lausn. Ég tel að þorri þjóðarinnar vilji eiga Ríkisútvarpið og vilji að það geti sinnt hlutverki sínu með sóma. Ég er ekki aðalatriðið í þessu máli. Það skiptir mestu í mínum huga að Ríkisútvarpið geti dafnað og að ekki þurfi að koma til afdrifaríkra uppsagna og grundvallarbreytinga á því góða menningarstarfi sem þjóðin hefur byggt upp í áratugi með rekstri Ríkisútvarps.“