Skurðlæknar boða til nýrra verkfallslotna

Skurðlæknafélag Íslands hafa nú boðað til nýrra verkfallslotna en atkvæðagreiðslu félagsins um verkfallsboðun skurðlækna fyrstu þrjá mánuði ársins 2015 er nú lokið.

Á kjörskrá voru 91 félagsmaður og greiddu 91,21% félagsmanna atkvæði. Allir þeir sem greiddu atkvæði samþykktu fyrirhugaðar verkfallsaðgerðir sem gert er ráð fyrir að hefjist þann 12. janúar næstkomandi.

Í tilkynningu frá Skuðlæknafélagi Íslands segir að niðurstaða kosninganna sé því enn afdráttarlausari en niðurstaða kosninga félagsmanna SKÍ í september síðastliðinn um verkfallsaðgerðir sem staðið hafa með hléum í október, nóvember og nú í desember. Niðurstaðan hefur verið tilkynnt ríkissáttasemjara og formanni Samninganefndar ríkisins.

„Náist ekki samningar fyrir 12. janúar nk. munu skurðlæknar sem starfa samkvæmt kjarasamningi fjármálaráðherra og Skurðlæknafélags Íslands þá hefja nýjar lotur verkfallsaðgerða. Hver verkfallslota mun ná yfir fjóra samfellda dag í mánuði, frá frá mánudegi til fimmtudags. Verkfallsloturnar verða sem hér segir:

Á öllum heilbrigðisstofnunumöðrum en Sjúkrahúsinu á Akureyri:

1. Frá miðnætti aðfararnótt mánudagsins 12. janúar 2015 til miðnættis fimmtudaginn 15. janúar 2015 (4 sólarhringar).

2. Frá miðnætti aðfararnótt mánudagsins 9. febrúar 2015 til miðnættis fimmtudaginn 12. febrúar 2015 (4 sólarhringar).

3. Frá miðnætti aðfararnótt mánudagsins 9. mars til miðnættis fimmtudaginn 12. mars 2015 (4 sólarhringar).

Á Sjúkrahúsinu á Akureyri:

1. Frá miðnætti aðfararnótt mánudagsins 19. janúar 2015 til miðnættis fimmtudaginn 22. janúar 2015 (4 sólarhringar).

2. Frá miðnætti aðfararnótt mánudagsins 16. febrúar 2015 til miðnættis fimmtudaginn 19. febrúar 2015 (4 sólarhringar).

3. Frá miðnætti aðfararnótt mánudagsins 16. mars til miðnættis fimmtudaginn 19. mars 2015 (4 sólarhringar).“