Ætlar að fá sér umboðsmann sem fyrst

Dagný Brynjarsdóttir, landsliðskona Íslands í knattspyrnu, hefur hug á því að spila sem atvinnumaður í Evrópu þegar skólagöngu hennar við Florida State University lýkur í desember. Dagný er á fjórða ári sínu í skólanum en skólalið hennar þykir til alls líklegt í úrslitakeppni NCAA keppninnar..

Dagný segist í samtali við Vísi ekki ætla að fara í „draft-ið“ í Bandaríkjunum að loknu tímabili. Hugurinn leiti til Evrópu og fyrstu löndin sem komi upp í kollinn séu Svíþjóð og Þýskaland. Ekkert sé hins vegar í hendi enda hún ekki með umboðsmann og þjálfarar hennar hjá skólaliðinu deili ekki með henni fyrirspurnum erlendra félaga að svo stöddu.

„Þeir vilja ekki að það trufli mig. Það pirrar mig svolítið,“ segir Dagný á léttum nótum. Hún er algjör lykilmaður í liði Seminoles sem mætir Northeastern University í 32-liða úrslitum NCAA í kvöld. Auk Dagnýjar leikur Eyjamærin Berglind Björg Þorvaldsdóttir með liðinu sem fór alla leið í úrslitaleik NCAA í fyrra þar sem liðið tapaði með minnsta mun.

Dagný, sem er 23 ára, hefur verið lykilmaður í íslenska landsliðinu undanfarin ár þrátt fyrir ungan aldur. Hún skoraði meðal annars sigurmark Íslands gegn Úkraínu í umspili um sæti í lokakeppni EM 2013. Þá tryggði hún Íslandi sömuleiðis sæti í átta liða úrslitum lokakeppninnar í Svíþjóð með skallamarki í 1-0 sigri á Hollandi. Hún hefur áður lýst því yfir að hún ætli langt í fótboltanum.

Leikmenn í háskólaboltanum mega hvorki þiggja laun né vera með umboðsmenn á sínum snærum. Þegar tímabilinu og prófunum lýkur í desember og hávaxni miðjumaðurinn frá Hellu útskrifast segir hún að það verði líklega sitt fyrsta verk að finna sér umboðsmann. Aðspurð segist hún ætla að vanda valið í þeim efnum.

Viðurkenningar Dagnýjar á tímabilinu:

Í sigurliði Seminoles í Atlantshafsdeildinni (ACC)

Í sigurliði Seminoles í úrslitakeppni ACC (keppni fjögurra efstu liða)

Sóknarmaður ársins í ACC

Valin í úrvalslið ACC

Valin í úrvalslið úrslitakeppninnar í ACC

Besti leikmaður úrslitakeppninnar í ACC

Þá var Dagný verðlaunuð fyrir námsárangur sinn.