Bendtner afgreiddi Serba fyrir tómum velli

Danmörk vann frábæran útisigur á firnasterku liði Serbíu, 3-1, í I-riðli undankeppni EM 2016 í fótbolta í kvöld.

Zoran Tosic, fyrrverandi leikmaður Manchester United, kom heimamönnum yfir á fjórðu mínútu fyrir framan enga áhorfendur, en Serbar þurfa að spila þrjá leiki fyrir luktum dyrum eftir atvikið sem kom upp í leik liðsins gegn Albaníu í síðasta mánuði.

Serbar héldu forystunni allt þar til framherjinn litríki Nicklas Bendtner jafnaði metin á 60. mínútu og aðeins tveimur mínútum síðar kom varnarmaðurinn Simon Kjær gestunum í 2-1.

Bendtner var svo aftur á ferðinni fimm mínútum fyrir leikslok þegar hann skoraði annað mark sitt og þriðja mark Dana sem sóttu þrjú stig til Belgrade.

Danir eru með sjö stig á toppi I-riðils eftir sigurinn en Portúgal, sem vann Armeníu í kvöld, er í öðru sæti með sex stig.