Ný rannsókn: Margra barna mæður standa sig best í vinnunni

Ef litið er til þrjátíu ára starfsferils kemur í ljós að mæður standa sig betur í vinnunni en barnslausar konur á nánast öllum sviðum. Mæður með tvö börn eða fleiri standa sig best. Þetta eru niðurstaðar nýlegrar bandarískrar rannsóknar. Washington Post greinir frá.

Rannsakendur vildu komast að því hvaða áhrif barnseignir hefðu á konur í fremstu röð. Þeirra leið til þess að bera saman frammistöðu kvenna var að horfa til þess hve margar ritrýndar greinar þær birtu. Úrtakið var rúmlega tíu þúsund hámenntað fólk á sviði hagfræði.

Þegar kom að karlmönnum var framlag feðra með eitt barn sambærilegt við barnslausa menn. Menn með tvö börn eða fleiri stóðu sig betur en hinir hóparnir tveir. Munurinn þegar kom að konunum var enn meira áberandi. Rannsakendur komust að því að á fyrstu fimm árum í starfi standa konur, sem aldrei eignast börn, sig mun verr en þær sem verða mæður á einum tímapunkti eða öðrum.

Hafa verður í huga að rannsakendur skoðuðu mjög afmarkaðan hóp kvenna sem lifa við lúxusaðstæður ef svo má að orði komast. Barnseignir voru í flestum tilfellum hluti af planinu og því fylgdu fríðindi eins og fæðingarorlof og veikindadagar. Þá höfðu konurnar efni á að greiða fyrir umönnun barna sinna svo þær gætu mætt í vinnuna. Mæður í láglaunastörfum búa yfirleitt ekki við sama munað.

Niðurstöðurnar ættu að vera vítamínssprauta fyrir mæður á vinnumarkaði sem hafa fengið nagandi samviskubit þegar þær hafa ekki náð að skila verkefni á réttum tíma vegna veikinda barns eða verið við það að sofna á fundi eftir andvökunótt með krílunum.

Ung börn hafa þó áhrif á vinnuframlag. Framleiðni minnkar um 15-17 prósent hjá mæðrum með ung börn. Fyrir margra barna móður minnkar framleiðni um 9,5 prósent með fyrsta barni, 12,5 prósent með barni númer tvö og 11 prósent með þriðja barni. Mæður með þrjú ung börn minnka því framleiðni móður í vinnu um 33 prósent.

En þar sem mæður standa sig betur bæði áður en þær eignast börn og eftir að börnin komast á aldur eru þær betri starfskraftar ef litið er til 30 ára starfsferils.

„Á meðan þú ert með ung börn hefur það áhrif á þig,“ segir Christian Zimmermann, einn af rannsakendunum. „Eftir að börnin komast á aldur eru áhrifin öfug.“

Niðurstöður rannsóknarinnar má kynna sér í skjalinu hér að neðan.