Fór á barinn á flugvélinni

Ástralskur karlmaður bíður nú ákæru eftir að hafa ekið og lagt vængjalausri flugvél sinni fyrir utan bar í smábæ í vesturhluta Ástralíu.

Mark McKenzie, talsmaður lögregunnar í smábænum Newman, segir að maðurinn hafi verið með hreyfla vélarinnar í gangi og stýrt henni með pedölum alla leið á barinn á Newman-hótelinu í miðbæ bæjarins síðastliðinn föstudag.

„Þetta var frekar heimskulegt athæfi,“ segir McKenzie. „Krakkar voru á leið heim úr skólanum. Þetta hefði getað farið illa. Vindgustur hefði einungis þurft til þar sem án vængja er vélin ekki stöðug.“

Í grein Guardian kemur fram að McKenzie segi að fólk álíti þetta frekar spaugilegt, en að lögreglu sé ekki skemmt og geri ráð fyrir að ákæra manninn á næstunni.