Lokuðu fíkniefnamarkaði á netinu

Lögregluyfirvöld í Bandaríkjunum og Evrópu lokuðu í dag Silk Road 2, leynilegum markaði á netinu þar sem meðal annars var hægt að kaupa fíkniefni og vopn. Á síðasta ári lokuðu sömu aðilar samskonar síðu sem hét Silk Road.

Bandaríska alríkislögreglan FBI hefur einnig handtekið mann sem talinn er hafa haft umsjón með síðunni. Fjallað er um málið á tæknisíðunni The Verge.

Maðurinn, sem heitir Blake Benthall, er 26 ára gamall. Hann hefur verið leiddur fyrir dómara vestanhafs vegna ákæru fyrir að hjálpa til við dreifingu fíkniefna, að fremja tölvugæpi, dreifingu á fölsuðum skilríkjum og peningaþvætti.

Samkvæmt FBI voru notendur Silk Road 2 um það bil 150 þúsund talsins og nam velta á síðunni um átta milljónum dollara, jafnvirði um 991 milljónar króna, á mánuði. FBI segir að um þrettán þúsund auglýsingar um fíkniefni hafi verið á síðunni í lok októbermánaðar.

Yfirvöld hafa verið meðvituð um Silk Road 2 síðan henni var lokað nákvæmlega ári eftir að hún fór fyrst í loftið. Lögreglan náði stjórn á síðunni eftir að útsendari heimavarnarráðuneytis Bandaríkjanna ávann sér traust Benthall og fékk hann til að afhenda sér fyrir stjórnunaraðgangi að henni.

Síðan er aðeins ein af mörgum sem spruttu upp í kjölfar þess að yfirvöld lokuðu hinum alræmda Silk Road markaði árið 2013. Þá var maður að nafni Ross Ulbricht handtekinn og sakaður um að hafa haft umsjón með síðunni sem velti umtalsverðum fjármunum vegna sölu fíkniefna, falsaðra skilríkja, vopna og annars varnings. 

Íslensk lögregluyfirvöld tóku þátt í að loka þeirri síðu en hún var hýst í gagnaveri Advania í Hafnarfirði.