Ósvífni að halda því fram að heimilin borgi leiðréttinguna

Forsætisráðherra segir það ósvífinn málflutning að halda því fram að heimilin eigi sjálf að standa undir leiðréttingu á húsnæðisskuldum þeirra, eins og þingflokksformaður Samfylkingarinnar hélt fram á Alþingi í dag. Þingflokksformaðurinn sagði ekki lengur talað um hrægammasjóði heldur ætti hækkun matarskatts og lækkun vaxtabóta að standa undir leiðréttingunni.

Þingflokksformaður Samfylkingarinnar sagði á Alþingi í dag að forsætisráðherra væri hættur að tala um að hrægammasjóðir ættu að standa undir lækkun skulda heimilanna eins og hann hafi gert fyrir kosningar. Nú ættu heimilin sjálf að standa undir leiðréttingunni.

„Þannig er skuldalækkun heimilanna sem fyrirhuguð er 5% af skuldum heimilanna. Og núna á sama tíma kemur flokkurinn fram með 5 prósenta hækkun á matarskattinum. Meðal skuldalækkun er um ein milljón króna á heimili. Það lækkar greiðslubyrðina um þetta fimm þúsund krónur á mánuði. Heimili með hundrað þúsund króna matarreikning fær fimm þúsund króna hækkun á matarskatti,“ sagði Helgi á Alþingi í dag.

Þá væri búið að draga úr vaxtabótum um 13 milljarða frá árinu 2011.

„Ætlar hæstvirtur forsætisráðherra að halda því fram að heimilin séu betur sett eftir en áður? Að hér sé um einhverjar aðgerðir að ræða sem skipti sköpum um eiginfjárstöðu heimilanna eða hjálpi heimilunum við að ráða við sín mánaðrlegu útgjöld,“ spurði Helgi.

„Ég veit bara ekki hvar ég á að byrja. Vegna þess að allt sem háttvirtur þingmaður sagði, allt, allt sem háttvirtur þingmaður sagði, hvert einasta atriði er rangt. Háttvirtur þingmaður hefur í gegnum tíðina oft á tíðum sýnt af sér ósvífni hér í ræðustól en í þetta skipti tókst honum að halda hér heila ræðu þar sem hann fór ekki með eitt atriði rétt,“ sagði Sigmundur Davíð Gunnlaugsson forsætisráðherra.

Ólíkt fyrri ríkisstjórn sem hefði framkvæmt um tvö hundruð breytingar á skattkerfinu til hækkunar, hefði núverandi ríkisstjórn lækkað skatta sem yki kaupmátt allra heimila og skattlagt fjármálafyrirtæki sem fyrri stjórn hefði samkvæmt skattarökum vinstrimanna þá fært fjármálafyrirtækjum í sinni stjórnartíð.

„Þannig að eftir þetta fjárlagafrumvarp rétt eins og eftir það síðasta verður fjármunum skilað til heimilanna. Fjörtíu milljörðum, fjörtíu milljörðum með frumvarpinu nú,“ sagði forsætisráðherra.

„Það er ekki nema von að hæstvirtur forsætisráðherra missi stjórn á ´sér. Það að afnema vörugjöld á nuddpottum er ekki mótvægisaðgerð við hækkun á nauðsynjar eins og matvöru og húshitun, hæstvirtur forsætisráðherra, þótt það kunni að vera það í einhverjum kreðsum,“ sagði Helgi Hjörvar.