Kári: Fjölmiðlafár á Íslandi

Kári Árnason, leikmaður enska B-deildarfélagsins Rotherham, segir í viðtali við staðarblaðið The Star að hann stefni á að klára frábæra viku með sigri á Leeds á heimavelli í kvöld.

Kári átti líkt og aðrir leikmenn íslenska landsliðsins frábæran leik þegar Ísland vann frækinn sigur á Hollandi, 2-0, á mánudagskvöld. Kári hélt þá upp á 32 ára afmælið sitt.

„Þetta var frábær afmælisgjöf. Þetta var alveg stórkostlegt,“ sagði hann í viðtalinu. „Við þekkjum auðvitað vel til leikmanna eins og Robin van Persie og Arjen Robben. Við lokuðum á þá frá öllum mögulegum hliðum. Planið var að enginn mátti selja sig og tapa návígum.“

„Það ríkir fjölmiðlafár á Íslandi. Þeir elska þetta vegna þess að við erum í efsta sæti riðilsins okkar,“ sagði Kári enn fremur og bætir við að Xavi og Zlatan Ibrahimovic séu bestu leikmennirnir sem hann hafi mætt.

„Þegar við lékum við Spánverja var ég á miðjunni. Eiður Smári Guðjohnsen sagði mér fyrir leikinn að ég skyldi ekki láta mér detta í hug að reyna ná boltanum af honum. Ég reyndi það einu sinni og hann fór illa með mig.“

„Það er svo í raun ekki hægt að spila gegn Ibrahimovic. Ef hann er í stuði er maður algjörlega varnarlaus. Hann er hávaxinn og sterkur en um leið afar teknískur.“

Kári er spenntur fyrir leiknum með sigri nær Rotherham að jafna Leeds að stigum. „Það væru frábær úrslit enda er Leeds eitt stærsta félag heims.“

Leikurinn hefst klukkan 18.45 og verður í beinni útsendingu á Stöð 2 Sport 2 HD.