Delph frá vegna klaufalegra meiðsla

Fabian Delph, miðjumaður Englands og Aston Villa, þarf að undirgangast aðgerð eftir að hafa farið úr axlarlið á æfingu á dögunum.

Þessi 24 ára gamli miðjumaður sem hefur spilað vel undanfarið verður líklega frá í tvo mánuði eftir að hafa dottið á öxlina þegar enginn var nálægt honum.

Delph mun líklega ekki verða klár fyrr en um jólahátíðarnar, en hann byrjaði í sigri enska landsliðsins gegn Eistland á sunnudaginn.

„Þetta var klaufalegt fall. Það var enginn nálægt honum og hann datt á öxlina," sagði Paul Lambert, stjóri Aston Villa, í samtali við fjölmiðla.