Veita tólf milljónum til baráttunnar gegn ebólu

Gunnar Bragi Sveinsson, utanríkisráðherra, hefur ákveðið að veita 12 milljónum króna til baráttunnar gegn ebólu. Þær munu fara til Matvælaáætlunar SÞ og Barnahjálpar SÞ. Stofnanirnar veita hjálpargögn á svæðum þar sem veiran hefur brotist út og hafa umsjón með að tryggja vatns- og hreinlætisaðstöðu á neyðarsvæðum.

Í tilkynningu frá Utanríkisráðuneytinu segir að útbreiðsla ebólu hafi aukist hratt frá því að faraldurinn braust út í Vestur-Afríku í mars og að öryggisráð Sameinuðu þjóðanna telji að faraldurinn ógni heimsfriði.

Nú þegar hafa um þrjú þúsund manns látist af völdum veirunnar í Líberíu, Síerra Leóne og Gíneu. Alþjóðaheilbrigðisstofnunin telur að fjöldi smitaðra muni þrefaldast á næstu tveimur mánuðum og verði um tuttugu þúsund í nóvember. Verði ekki gripið til róttækra aðgerða nú þegar fari þeim hratt fjölgandi.

Nú er mikil þörf á sérhæfðu starfsfólki, neyðarbirgðum, sjúkraflutningatækjum, matvælum, vatni og hreinlætisaðstöðu. Í tilkynningunni segir að mat samræmingarskrifstofu SÞ í mannúðarmálum og Alþjóðaheilbrigðisstofnunarinnar sé að eina milljón bandaríkjadala þurfi frá alþjóðasamfélaginu til að geta sinnt brýnustu þörfum íbúa á svæðinu.