Innlent

Stjarnfræðilega litlar líkur á útbreiðslu ebólu á Íslandi

Sunna Karen Sigurþórsdóttir skrifar
Sigurður Guðmundsson, smitsjúkdómalæknir á Landspítalanum.
Sigurður Guðmundsson, smitsjúkdómalæknir á Landspítalanum. vísir/ap
Smitsjúkdómalæknir á Landspítalanum segir einhverjar líkur á að hin skæða ebóluveira muni berast hingað til lands en þó sé það nær útilokað að hún nái hér einhverri útbreiðslu. Því hefur verið gripið til ráðstafanna í samráði við almannavarnir ríkislögreglustjóra og hafa heilbrigðisstarfsmenn sótt fræðslufundi þess efnis.

„Það er alveg mögulegt að ebólusýktur einstaklingur komi hingað til lands. Við erum búin að undirbúa það mjög vel, með þátttöku  Landspítalans og almannavarnardeildar ríkislögreglustjóra. Það er heilmikill undirbúningur, búið að halda fundi um sjúkdóminn og ræða við heilbrigðisstarfsfólk sem mögulega kynni að þurfa að sinna slíkum sjúklingi,“ segir Sigurður Guðmundsson smitsjúkdómalæknir.

Hann segir þó útilokað að veiran nái útbreiðslu hérlendis. „Ég leyfi mér að segja það að það eru stjarnfræðilegar litlar líkur á að ebóla nái að dreifa sér hér á landi. Við höfum öflug tæki og tól til einangrunar, en þetta mun kosta heilmikið til viðbragða af okkar hálfu. Við þyrftum að loka hálfum sjúkragangi til að sinna svona sjúklingi. Þetta tekur heilmikinn toll.“

Samtökin Læknar án landamæra segja að heimsbyggðin sé að tapa í baráttunni gegn ebóluveirunni og segja að ástandið hjá meðferðarstöðvum í Vestur-Afríku sé orðið þannig að þangað komi fólk til „deyja eitt og yfirgefið“.

Rúmlega 1.500 manns hafa orðið faraldrinum að bráð og eru um 3.500 sýktir. Faraldurinn er sagður stjórnlaus og telur Alþjóðaheilbrigðisstofnunin að um tuttugu þúsund manns muni sýkjast af þessari skæðustu veiru sögunnar. Sjö hafa fengið tilraunalyf við veirunni, tveir þeirra eru látnir. Tilraunalyfið ZMapp var prófað á átján öpum, sýktum af veirunni, og læknuðust þeir allir.

„Vissulega eru líkur á að einstaklingur, ferðamaður, sem til dæmis millilendir hér á landi sé sýktur af veirunni. Eða þá að einn af þeim hjálparstarfsmönnum sem þangað fer veikist. En það er mjög ólíklegt því þeir eru fáir og að loknum störfum verður haft sérstakt eftirlit með þeim annars staðar áður en þeir koma síðan heim,“ segir Sigurður.

Engin lækning er til við ebóla-vírusnum. Hann veldur innvortis blæðingum og líffærabilun. Vírusinn smitast milli manna meðal annars í jarðarförum þeirra sem hafa látist af hans völdum. Rúmlega helmingur þeirra sem smitast af ebóla-vírusnum deyr.


Tengdar fréttir

Lést þrátt fyrir ebóla-lyf

Líberískur læknir, sem var á meðal þriggja Afríkubúa sem fengu tilraunalyf við ebóla-veirunni, er látinn.

Annar sérfræðingur fellur í Síerra Leone

Mikill skortur er nú á læknum í landinu en andlát Dr. Modupeh Cole, ber að einungis tveimur vikum eftir fráfall dr. Sheiks Omarrs Khan sem stjórnaði aðgerðum gegn veirunni í austurhluta landins.

Óttast frekari útbreiðslu ebólu

Yfirvöld í Líberíu óttast frekari útbreiðslu ebólu eftir að ráðist var á heilsugæslustöð sem hýst einstaklinga sem grunaðir voru um að hafa smitast af ebólu.

Fjöldi ebólusmitaðra gæti margfaldast

Alþjóðaheilbrigðismálastofnunin (WHO) hefur gefið út að ríflega tuttugu þúsund manns til viðbótar eigi á hættu að smitast af ebólu.

Baráttan gegn ebólu að tapast

Samtökin Læknar án landamæra segja að heimsbyggðin sé að tapa í baráttunni gegn ebóluveirunni.

Meira en þúsund manns hafa látið lífið

Einungis tveir Bandaríkjamenn og einn Spánverji hafa til þessa fengið að njóta góðs af lyfjum. Afríkubúar hafa hins vegar enn engin lyf fengið.




Fleiri fréttir

Sjá meira


×