Gerðu frekari árásir á olíuvinnslur Íslamska ríkisins

Bandaríkin og bandamenn þeirra gerðu loftárásir á olíuvinnslur Íslamska ríkisins í dag auk annarra skotmarka. Þá heldur árás vígamanna IS áfram gegn bænum Kobani við landamæri Tyrklands. Bærinn hefur nú verið í herkví IS í rúma viku.

Um 140 þúsund manns hafa flúið í átt að Tyrklandi vegna árásarinnar. Flugvélar Bandaríkjanna Sádi-Arabíu og Sameinuðu arabísku furstaveldanna gerðu loftárásir á vígamenn IS við bæinn í gær, en ekki í dag, samkvæmt frétt á vef BBC.

Fyrir daginn í dag hafa loftárásir verið gerðar á tólf olíuvinnslur IS en samtökin hagnast gífurlega á sölu unnar olíu á svörtum mörkuðum.

Mehmet Ozer varð vitni að árásunum og sagði eldtungur hafa náð allt að sextíu metra í loftið.

Hér að neðan má sjá myndband Reuters af bardögum við landamærabæinn Kobani í Norður-Sýrlandi.