Forseti Real: Rétt að selja Di Maria

Cristiano Ronaldo, stórstjarna Real Madrid, var ekki sáttur við að félagið skildi selja þá Angel di Maria og Xabi Alonso frá félaginu.

Svo svekktur var Ronaldo að hann gagnrýndi forseta félagsins, Florentino Perez, opinberlega. Perez tók því þó ekki illa.

"Ég þekki Ronaldo mjög vel. Hann er besti leikmaður heims og enginn efast um hollustu hans í garð félagsins," sagði Perez.

"Ég er búinn að vera hérna síðan árið 2000. Það virðist vera að þeir sem fara séu bestu menn heims en efast er um þá sem koma. Ég byrjaði á að kaupa Zidane og síðasti maðurinn í fyrra var Bale. Við gerðum Di Maria eins gott tilboð og við gátum en hann samþykkti það ekki.

"Í staðinn fengum við James Rodriguez sem var einn besti leikmaður HM. Di Maria og aðrir sem hafa farið njóta virðingar okkar. Di Maria hefði orðið næstlaunahæsti leikmaður félagsins en hann samþykkti ekki tilboðið. Við fengum gott tilboð og töldum því rétt að selja."