Boris Johnson staðfestir þingframboð

Boris Johnson, borgarstjóri Lundúnaborgar, hefur staðfest að hann hyggi á framboð í þingkosningunum sem fram fara í Bretlandi á næsta ári.

Johnson mun bjóða sig fram í kjördæmi í vesturhluta Lundúna, en hann er af mörgum talinn líklegur arftaki Davids Cameron forsætisráðherra í stóli formanns Íhaldsflokksins þegar fram í sækir.

Í frétt Reuters segir að John­son hafi tilkynnt fyrr í mánuðinum að hann hugðist „öll­um lík­ind­um“ bjóða sig fram í bresku þing­kosn­ing­un­um á næsta ári.

Johnson hefur skilað inn framboðsgögnum og mun bjóða sig fram í kjördæminu Uxbridge og South Ruislip, en kosningar fara fram í maí á næsta ári. Í síðustu þingkosningum unnu Íhaldsmenn öruggan sigur í kjördæminu sem um ræðir.

Johnson er nú á sínu öru kjörtímabili sem borgarstjóri og hefur lengi vakið athygli fyrir að vera sérvitur og úfið hár sitt. Þá vakti vaskleg framganga hans í tengslum við Ólympíuleikana 2012 einnig athygli.

Johnson gegndi stöðu þingmanns á árunum 2001 til 2008 þegar hann sagði af sér þegar hann ákvað að sækjast eftir embætti borgarstjóra.