400 ára gömul kenning Keplers sönnuð

Kenning Johannesar Keplers um hvernig best sé að stafla kúlulaga hlutum hefur nú verið sönnuð. Þýski vísindamaðurinn Kepler fullyrti árið 1611 að skilvirkast væri að stafla þeim í píramída en gat sjálfur aldrei sannað það, ekki frekar en nokkur annar þar til nú.

Menn hafa lengi raðað kúlulaga hlutum líkt og fallbyssukúlum og ávöxtum í píramída og hafa stærðfræðingar lengi reynt að sanna kenninguna um að þetta sé skilvirkasta leiðin til að raða slíkum hlutum.

Árið 1998 kynnti Thomas Hales við Pittsburgh-háskóla útreikninga sína sem hann sagði sanna kenningu Keplers. Tólf stærðfræðingar fóru þá yfir 300 síðna útreikninga Hales og bentu á að sönnunin væri einungis 99 prósent rétt.

Í frétt New Scientist segir að frá árinu 2003 hafi Hales fundið sig knúinn til að leysa málið og á sunnudaginn kynnti hann svo nýjan hugbúnað sem endanlega sannaði kenningu Keplers – að skilvirkast sé að raða appelsínum í píramída.

Hales segist finna fyrir gríðarlegum létti eftir að hafa kynnt niðurstöður sínar. „Mér líður skyndilega tíu árum yngri.“