Kári segir verðlaunin pjatt

Bandarísku Alzheimerssamtökin heiðruðu í morgun Kára Stefánsson, forstjóra Íslenskrar erfðagreiningar, á alþjóðaþingi sínu í Kaupmannahöfn. Kári veitti þar viðtöku Inge Grundke-Iqbal verðlaunum samtakanna fyrir Alzheimersrannsóknir og flutti fyrirlestur við þetta tækifæri. Fréttastofa heyrði í Kára þar sem hann var staddur í Kaupmannahöfn, strax eftir athöfnina.

Kári er fyrstur manna til að hljóta þessa viðurkenningu sem samtökin hyggjast veita í framtíðinni fyrir mikilvægustu rannsóknir um orsakir sjúkdómsins, sem birtar eru síðustu tvö árin fyrir þing sambandsins. Hvaða rannsókn er þetta?

„Þetta er unnið af stórum hópi fólks uppi á Íslandi. Hluti af honum er við Íslenska erfðagreiningu – annar hluti er við Landspítalann. Við unnum þetta mikið í samvinnu við Jón Snædal öldrunarlækni, Pálma Jónsson og fleiri uppi á Landspítala. Síðan var stór hópur við ÍE, sem vann við þessa erfðafræði. Það sem við fundum er stökkbreyting sem ver gegn alzheimer-sjúkdómi og hjálpaði til við að skrifa lokakaflann í langri sögu um ákveðið eggjahvítuefni sem virðist spila mikla rullu í að búa til þennan leiðindasjúkdóm.“

Sem sagt, það sem Kári og félagar fundu var stökkbreyting sem ver gegn sjúkdómnum...

„Og, af hverju skiptir það miklu máli? Það bendir manni á lífræna ferla sem má nýta til að búa til lyf til að fyrirbyggja sjúkdóminn. En, það er hins vegar langt þangað til slík lyf koma á markað. Þetta er einfaldlega uppgötvun um líffræði sjúkdómsins sem býður uppá þann möguleika að nýta hann til meðferðar og jafnvel endanlega til greiningar.“

En, hvaða þýðingu hafa þessi verðlaun?

„Þau hafa enga þýðingu. Þetta er pjatt. Svona viðurkenningar skipta ekki meira máli heldur en sú vinna sem leiddi til þess að þú fékkst verðlaunin. Þetta gerir ekkert annað fyrir þig en það að menn segja bara: Allt í lagi, þetta var fín vinna sem þú vannst. Þetta er svona eins og þegar maður fékk stjörnu í bókina í barnaskóla.“