Brasilíumenn niðurlægðir á heimavelli

Fimmfaldir heimsmeistarar Brasilíu voru niðurlægðir af mögnuðum Þjóðverjum í undanúrslitaleik liðanna á HM í kvöld.

Þýskaland vann ótrúlegan 7-1 sigur eftir að hafa gert út um leikinn með fjórum mörkum á sex mínútna kafla í fyrri hálfleik.

Miroslav Klose skoraði annað mark Þýskalands í leiknum og sitt sextánda mark í úrslitakeppni HM frá upphafi. Það er met en fyrir leikinn var hann jafn Brasilíumanninum Ronaldo, sem tryggði sínum mönnum 2-0 sigur þegar þessi lið mættust síðast á HM - í úrslitaleiknum árið 2002.

Thomas Müller kom Þýskalandi á bragðið á elleftu mínútu er hann stýrði hornspyrnu Toni Kroos í netið. Müller var skilinn eftir dauðafrír á fjarstöng og gaf slæmur varnarleikur Brasilíu vísbendingu um það sem koma skyldi.

Klose skoraði svo annað markið á 23. mínútu er hann fylgdi eftir eigin skoti sem var varið. Við það mark virtust Brasilíumenn einfaldlega brotna saman en Toni Kroos skoraði næstu tvö mörk sinna manna - fyrst á 24. mínútu og svo 26. mínútu.

Sami Khedira bætti svo fimmta markinu við þremur mínútum síðar en þýsku landsliðsmennirnir léku sér einfaldlega að hörmulegum varnarmönnum brasilíska liðsins.

Varamaðurinn Andre Schürrle bætti svo tveimur mörkum við í síðari hálfleik áður en Oscar klóraði í bakkann fyrir Brasilíu í uppbótartíma.

Neymar var sem kunnugt er frá vegna meiðsla í kvöld og þá var fyrirliðinn Thiago Silva í banni. Hvort þeir hefðu bjargað einhverju fyrir heimamenn í kvöld skal ósagt látið en úrslit leiksins fara í sögubækurnar sem einhver ótrúlegustu tíðindi í sögu keppninnar.