Rússíbönum í Stokkhólmi og Helsinki lokað vegna dauðsfallsins

Forsvarsmenn skemmtigarðanna Gröna Lund í Stokkhólmi og Borgbacken í Helsinki hafa lokað rússíbönum sínum Insane og Kirnu ótímabundið í kjölfar banaslyss gærdagsins þar sem átján ára Íslendingur féll úr sambærilegum rússíbana í skemmtigarðinum Terra Mitica í spænska bænum Benidorm.



„Við munum halda honum lokuðum þar til við fáum frekari upplýsingar um hvað gerðist og við höfum yfirfarið rússíbana okkar,“ segir Annika Troselius, fjölmiðlafulltrúi Gröna Lund, í viðtali við sænska Aftonbladet, og bætir við að öryggið verði ávallt að vera í fyrirrúmi. Troselius segir að starfsmenn garðsins muni ræða við forsvarsmenn framleiðandans, Stengel Engineering, og komast nákvæmlega að því hvað fór úrskeiðis í slysinu hörmulega á Spáni.