Scolari bað brasilísku þjóðina afsökunar

„Hver ber ábyrgð á úrslitunum? Það er ég,“ sagði Luiz Felipe Scolari, landsliðsþjálfari Brasilíu, eftir 7-1 tap gegn Þýskalandi í undanúrslitum HM í kvöld.

„Það má kenna okkur öllum um úrslit leiksins en ég er sá sem stillti upp byrjunarliðinu og lagði upp leikinn. Það var mitt val,“ bætti hann við.

„Við reyndum hvað við gátum og gerðum okkar besta. En við mættum í kvöld frábæru þýsku liði. Við brugðumst ekki við því að lenda undir og Þjóðverjarnir geta ekki einu sinni útskýrt hvað gerðist.“

„Skilaboð mín til brasilísku þjóðarinnar eru þessi. Vinsamlegast fyrirgefið okkur fyrir þessa frammistöðu. Mér þykir leitt að okkur tókst ekki að komast í úrslitaleikinn.“

„Við ætlum að reyna að vinna leikinn um þriðja sætið. Við höfum enn eitthvað til að keppa að.“