Dró mann úr brennandi bíl

Lögreglumaður á frívakt dró meðvitundarlausan mann úr brennandi bíl sem ekið hafði verið á bensíndælu í bænum White Plains, í New York fylki í Bandaríkjunum. Atvikið náðist á myndband.

Lögreglumaðurinn John A. Vescio var að dæla bensíni á bíl sinn þegar eldri maður fékk blóðsykurfall og missti meðvitund. Hann keyrði á bensíndæluna sem John stóð við og við það kviknaði í henni.

John náði að koma sér undan bílnum eins og sést á meðfylgjandi myndbandi sem birt var á vef Huffington Post, en snýr fljótt aftur. Hann nær að draga manninn úr bílnum rétt áður en eldurinn breiðist út.

„Þetta gerðist svo hratt. Það var erfitt að hugsa og í raun brást ég bara við, sagði John.