Drápu þá sem gátu ekki farið með vers úr Kóraninum

Að minnsta kosti 48 manns létu lífið þegar skæruliðar réðust á hótel og lögreglustöð í strandbænum Mpeketoni í Kenía í gær.

Frá þessu greinir BBC. Vitni segja skotbardaga hafa staðið yfir í marga klukkutíma ásamt því að kveikt var í byggingum. Hryðjuverkasveitin al-Shabab frá Sómalíu hefur lýst yfir ábyrgð á drápunum og segir þau framin vegna veru herliðs Keníumanna í Sómalíu.

Liðsmenn al-Shabab eru múslimar og greina heimildir BBC frá því að þeir hafi skotið til bana alla þá sem ekki gátu farið með vers úr Kóraninum. Skotárásin hófst um hálfsex að kvöldi þegar margir voru að fylgjast með Heimsmeistaramótinu í knattspyrnu.

Þetta er mannskæðasta árásin í landinu síðan í september síðastliðnum, þegar 67 manns hið minnsta voru drepnir í umsátri al-Shabab um verslunarmiðstöð í Nairobi.