Fleiri láta lífið í átökum í Bagdad

Rúmlega 50 manns eru látnir og fleiri tugir manna særðir eftir röð sprenginga í Bagdad, höfuðborg Íraks, í kvöld.

Að minnsta kosti átta mismunandi árásir áttu sér stað víðsvegar um borgina á einum klukkutíma, samkvæmt BBC. Skotmörkin voru fyrst og fremst hverfi Shia-múslima.

Ofbeldi í landinu hefur færst í aukana undanfarið og segja Sameinuðu Þjóðirnar að rúmlega átta þúsund manns hafi látist í átökum í landinu í fyrra, sem er hæsta tala látinna frá því árið 2007. Ríkisstjórnin kennir skæruliðum Sunni-múslima um auknar blóðsúthellingar en aðrir hafa ásakað ríkisstjórn Nouri Maliki forsætisráðherra, sem er Shia-múslimi, um að styggja Sunni-hópinn.

Auk sprenginganna um kvöldið sátu skæruliðar um háskólasvæði í bænum Ramadi fyrr um daginn. Nemendur voru teknir í gíslingu og er talið að nokkir hafi látið lífið í skothríð þegar árásarmennirnir voru hraknir í burtu.