Skipar ráðherra í nýja ríkisstjórn

Narendra Modi, nýkjörinn forsætisráðherra Indlands, gaf út í morgun hvaða einstaklingar mynda nýja ríkisstjórn í landinu.

Ráðherrarnir verða alls 23 en áður voru þeir 28 í stjórnartíð Manmohans Singh, fyrrum forsætisráðherra.

Rajnath Singh verður innanríkisráðherra, Arun Kaitley hefur verið skipaður varnar- og fjármálaráðherra og Sushma Swaraj utanríkisráðherra.

Modi er formaður flokks þjóðernissinnaðra hindúa og hlaut flokkurinn hreinan meirihluta í þingkosningunum en aldrei áður hefur það gerst á Indlandi.

Modi kemur úr verkamannafjölskyldu og hans helstu kosningaloforð voru að rétta af efnahag landsins og berjast gegn spillingu.

Þingkosningarnar voru þær fjölmennustu lýðræðislegu kosningar í sögunni. Kjörsókn var um 66 prósent og alls greiddu um 550 milljónir Indverja atkvæði. Þingsæti eru 543 og hlaut flokkur Modi 282 þeirra.