Alfreð markakóngur í Hollandi

Alfreð Finnbogason gulltryggði sér gullskóinn í lokaumferð hollensku úrvalsdeildarinnar í dag. Alfreð skoraði úr vítaspyrnu í 3-0 útisigri Heerenveen á RKC Waalwijk, en hann endaði tímabilið með 29 mörk í 31 leik, auk þess að gefa tíu stoðsendingar.

Félagi hans í íslenska landsliðinu, Jóhann Berg Guðmundsson, var einnig á skotskónum þegar AZ Alkmaar gerði 1-1 jafntefli við Feyenoord. Aron Jóhannsson lék ekki með AZ í dag, en hann skoraði 17 mörk á tímabilinu sem tryggði honum bronsskóinn.

Kolbeinn Sigþórsson lék í rúmar 80 mínútur þegar Hollandsmeistarar Ajax gerðu 2-2 jafntefli við NEC Nijmegen. Guðlaugur Victor Pálsson lék allan leikinn fyrir Nijmegen.