„Fólk horfir með kvíða til næstu daga og vikna“

Fjórir úkraínskir hermenn létust  í hörðum átökum milli hersveita og liðsmanna aðskilnaðarsinna í borginni Sloviansk í dag. Íslendingur, sem leiðir eftirlitssveit á vegum Öryggis- og samvinnustofnunar Evrópu í Kænugarði, segir fólk óttast að átökin stigmagnist með degi hverjum og breiðist hratt út. 

Úkraínski herinn lokaði í gær þjóðveginum til Slóvíansk, en borgin hefur meira og minna verið á valdi vopnaðra aðskilnaðarsinna síðustu vikur, þar sem þeir hafa komið sér fyrir í opinberum byggingum og komið upp vegatálmum til að hindra að úkraínski herinn komist inn í borgina.

Til harðra átaka kom í dag þegar herinn sótti inn í miðborgina. Staðfest er að fjórir hafi látið lífið og tugir særst. Þá var úkraínsk herþyrla skotin niður í útjaðri borgarinnar.

Átökin í Úkraínu hófust í Kænugarði í nóvember og færðust síðan yfir á Krímskaga og í austurhéruðin. Síðustu daga hafa svo blossað upp átök í suðurhluta landsins og hátt í fjörtíu létust á föstudag þegar kveikt var í byggingu í Odessa þar sem aðskilnaðarsinnar höfðu leitað skjóls.

Stefán Haukur Jóhannesson hefur starfað á vegum ÖSE í Kænugarði síðustu vikur. Hann segir fólk óttast að átökin í Odessa séu fyrirboði um það sem koma skal, og að spennan muni stigmagnast í aðdraganda forsetakosninganna 25 maí næstkomandi.

„Vissulega er undirliggjandi spenna og fólk horfir með kvíða til næstu daga og vikna. Það sem er að gerast í austurhluta landsins og núna suðurhlutanum er alveg skelfileg þróun mála. Fólk vonast til að það róist aðeins en það er mjög erfitt að segja til um framhaldið,“ segir Stefán.