Leikmenn Paris St-Germain urðu meistarar í upphitun

Paris St-Germain varð í kvöld franskur meistari í fótbolta annað árið í röð en Parísarmenn þurftu þó ekki að klára sinn leik í kvöld til að landa titlinum.

Mónakó liðið náði nefnilega aðeins jafntefli á móti fallbaráttuliði Guingamp sem þýddi að leikmenn Paris St-Germain urðu meistarar á meðan þeir voru að undirbúa leik sinn á móti Rennes.

Lið AS Monaco varð að vinna leikinn til þess að halda í vonina um að vinna titilinn en Paris St-Germain gat samt alltaf tryggt sér titilinn með sigri í sínum leik.

Dimitar Berbatov kom AS Monaco í 1-0 í leiknum en Fatih Atik jafnaði metin í lokin og tryggði ekki bara Guingamp mikilvægt stig heldur einnig Parísarmönnum franska meistaratitilinn.

Paris St-Germain er með sjö stigum meira en AS Monaco fyrir sinn leik en aðeins sex stig eru eftir í pottinum fyrir lærisveina Claudio Ranieri.