Sölvi lék allan leikinn í markalausu jafntefli

Sölvi Geir Ottesen lék allan leikinn fyrir FC Ural sem gerði markalaust jafntefli við Tom Tomsk á heimavelli í rússnesku úrvalsdeildinni í dag.

Heimamenn voru meira með boltann og fengu besta færi leiksins þegar dæmd var vítaspyrna á 74. mínútu. Ilie Cebanu gerði sér hins vegar lítið fyrir og varði spyrnu Spartak Gogniyev.

Þetta var 15. leikur Sölva fyrir FC Ural í deildinni á tímabilinu, en hann kom til félagsins frá FCK í Danmörku í ágúst 2013.

FC Ural, sem vann sér sæti í rússnesku úrvalsdeildinni á síðasta tímabili, situr í 11. sæti deildarinnar, þremur stigum á undan Tom Tomsk sem situr í því 14.