Abidal fór í fússi

Eric Abidal var ekki ánægður með að hafa ekki verið valinn í hóp Monaco fyrir leik gegn Lille í frönsku úrvalsdeildinni um helgina.

Abidal er fyrirliði liðsins en var ekki valinn í leikmannahópinn að þessu sinni af Claudio Ranieri knattspyrnustjóra.

Svo óánægður var Frakkinn með ákvörðun ítalska stjórans að hann yfirgaf leikvanginn í leyfisleysi. Abidal baðst síðar afsökunar.

„Ræddi við varaforsetann og þjálfarann. Allt í lagi á ný,“ skrifaði Abidal á Twitter. „Ég bið leikmennina afsökunar.“

Ranieri staðfesti síðar að málið væri útkljáð. „Það hefði verið mikilvægt fyrir hann að vera á staðnum því hann er fyrirliði. En ég mun ekki erfa það við hann.“