„Fyrstu dagana fór ég ekki út úr húsi"

Fyrstu dagana fór ég ekki út úr húsi, segir maður sem fór illa út úr gagnastuldi frá Vodafone. Miklu magni persónulegra skilaboða frá honum var lekið á netið og tekur hann þátt í hópmálsókn á hendur fyrirtækinu.

Nýlega greindum við frá því að stofnað hefði verið málsóknarfélag til að sækja bætur á hendur Vodafone vegna upplýsingaleka frá félaginu í nóvember. Fyrirhuguð hópmálsókn yrði sú fyrsta sinnar tegundar hér á landi.

Fjölskyldumaður á höfuðborgarsvæðinu er einn þeirra sem komu verst út úr málinu og meðal þess sem lak út frá honum voru bankaupplýsingar og mörg afar persónuleg skilaboð, eins og sjá má dæmi um í meðfylgjandi myndskeiði. Hann segir lekann hafa haft mikil áhrif á sig, bæði andleg og líkamleg.

„Fyrstu dagana eftir þetta fór ég ekki út úr húsi og átti meira að segja erfitt með að svara símanum. Ég upplifði mikla félagsfælni og svaf illa sem endaði með því að ég þurfti að fara á sterk svefnlyf sem gerðu að verkum að ég var eiginlega óvinnufær daginn eftir vegna sljóleika. Þannig að þetta hafði mikil áhrif og hefur enn, ég er ekki búinn að jafna mig á þessu ,“ segir hann.

Lögmaður málsóknarfélagsins telur Vodafone hafa brotið eigin verklagsreglur um eyðingu gagna, sem settar voru að kröfu Persónuverndar og er það í skoðun.

„Það er ýmislegt sem maður ræðir við ákveðna einstaklinga um þriðja aðila sem á aldrei að opinberast og þegar sá þriðji sér þá umræðu getur það skemmt fyrir,“ segir maðurinn.

Þannig að þetta hefur skemmt vinasambönd fyrir þér?

„Já, þetta hefur því miður gert það en vonandi er hægt að laga það með tíð og tíma.“

Maðurinn telur að ekki hafi verið farið að lögum og reglum.

„Númer eitt, tvö og þrjú vona ég að þetta skili því að ég fái viðurkenningu á að það hafi verið brotið á mér,“ segir maðurinn að lokum.